श्रीकृष्ण जन्मोत्सव ( प्रसंग प्रकार ) : रचना सूची
Avatar

ब्रज भयौ महर कैं पूत, जब यह बात सुनी ।
सुनि आनन्दे सब लोग, गोकुल नगर-सुनी ॥
अति पूरन पूरे पुन्य, रोपी सुथिर थुनी ।
ग्रह-लगन-नषत-पल सोधि, कीन्हीं बेद-धुनी ॥
सुनि धाई सब ब्रज नारि, सहज सिंगार किये ।
तन पहिरे नूतन चीर, काजर नैन दिये ॥
कसि कंचुकि, तिलक लिलार, सोभित हार हिये ।
कर-कंकन, कंचन-थार, मंगल-साज लिये ॥
सुभ स्रवननि तरल तरौन, बेनी सिथिल गुही ।
सिर बरषत सुमन सुदेस, मानौ मेघ फूही ॥
मुख मंडित रोरी रंग, सेंदूर माँग छुही ।
उर अंचल उड़त न जानि, सारी सुरँग सुही ॥
ते अपनैं-अपमैं मेल, निकसीं भाँति भली ।
मनु लाल-मुनैयनि पाँति, पिंजरा तोरि चली ॥
गुन गावत मंगल-गीत,मिलि दस पाँच अली ।
मनु भोर भऐँ रबि देखि, फूली कमल-कली ॥
पिय पहिलैं पहुँचीं जाइ अति आनंद भरीं ।
लइँ भीतर भुवन बुलाइ सब सिसु पाइ परी ॥
इक बदन उघारि निहारि, देहिं असीस खरी ।
चिरजीवो जसुदा-नंद, पूरन काम करी ॥
धनि दिन है, धनि ये राति, धनि-धनि पहर घरी ।
धनि-धन्य महरि की कोख, भाग-सुहाग भरी ॥
जिनि जायौ ऐसौ पूत, सब सुख-फरनि फरी ।
थिर थाप्यौ सब परिवार, मन की सूल हरी ॥
सुनि ग्वालनि गाइ बहोरि, बालक बोलि लए ।
गुहि गुंजा घसि बन-धातु, अंगनि चित्र ठए ॥
सिर दधि-माखन के माट, गावत गीत नए ।
डफ-झाँझ-मृदंग बजाइ, सब नँद-भवन गए ॥
मिलि नाचत करत कलोल, छिरकत हरद-दही ।
मनु बरषत भादौं मास, नदी घृत-दूध बही ॥
जब जहाँ-जहाँ चित जाइ, कौतुक तहीं-तहीं ।
सब आनँद-मगन गुवाल, काहूँ बदत नहीं ॥
इक धाइ नंद पै जाइ, पुनि-पुनि पाइ परैं ।
इक आपु आपुहीं माहिं, हँसि-हँसि मोद भरैं ॥
इक अभरन लेहिं उतारि, देत न संक करैं ।
इक दधि-गोरोचन-दूब, सब कैं सीस धरैं ॥
तब न्हाइ नंद भए ठाढ़, अरु कुस हाथ धरे ।
नाँदी मुख पितर पुजाइ, अंतर सोच हरे ॥
घसि चंदन चारु मँगाइ, बिप्रनि तिलक करे ।
द्विज-गुरु-जन कौं पहिराइ, सब कैं पाइ परे ॥
तहँ गैयाँ गनी न जाहिं, तरुनी बच्छ बढ़ीं ।
जे चरहिं जमुन कैं तीर, दूनैं दूध चढ़ीं ॥
खुर ताँबैं, रूपैं पीठि, सोनैं सींग मढ़ीं ।
ते दीन्हीं द्विजनि अनेक, हरषि असीस पढ़ीं ॥
सब इष्ट मित्र अरु बंधु, हँसि-हँसि बोलि लिये ।
मथि मृगमद-मलय-कपूर, माथैं तिलक किये ॥
उर मनि माला पहिराइ, बसन बिचित्र दिये ।
दै दान-मान-परिधान, पूरन-काम किये ॥
बंदीजन-मागध-सूत, आँगन-भौन भरे ।
ते बोलैं लै-लै नाउँ, नहिं हित कोउ बिसरे ॥
मनु बरषत मास अषाढ़, दादुर-मोर ररे ।
जिन जो जाँच्यौ सोइ दीन, अस नँदराइ ढरे ॥
तब अंबर और मँगाइ, सारी सुरँग चुनी ।
ते दीन्हीं बधुनि बुलाइ, जैसी जाहि बनी ॥
ते निकसीं देति असीस, रुचि अपनी-अपनी ।
बहुरीं सब अति आनंद, निज गृह गोप-धनी ॥
पुर घर-घर भेरि-मृदंग, पटह-निसान बजे ।
बर बारनि बंदनवार, कंचन कलस सजे ॥
ता दिन तैं वै ब्रज लोग, सुख-संपति न तजे ।
सुनि सबकी गति यह सूर, जे हरि-चरन भजे ॥

पद अज्ञात 15/11/2023

Avatar

Avatar
भजन अज्ञात 15/09/2023

Avatar

Avatar

Avatar

आज दिन सोने को कीजो महाराज 
        सोने को सब दिन सोने की रात
सोने की दियरा जलाओ महाराज 
सुरहन गौ के गोबर मंगाए 
        ढिग धर अंगन लिपाओ महाराज || 
ढिग धर अंगन लिपाए भुवन में 
        मुतियन चौक पुराओ महाराज ||
मुतियन चौक पुराए भुवन में 
        चन्दन चौकी धराओं महाराज || 
चन्दन चौकी धराई भुवन में 
        कंचन कलश धराओं महाराज || 
कंचन कलश धराए भुवन में  
        चौमुख दियला जलाओ महाराज || 
चौमुख दियला जलाए भुवन में  
        इमरत अरग दुआओ महाराज || 
इमरत अरग दुआए  भुवन में  
        रानी चौक में आई महाराज || 
रानी यशोदा रानी चौक में आई
        मोहन कंठ लगाए महाराज || 
मोहन कंठ लगाए यशोदा 
        हीरा लाल लुटाओ महाराज || 
आज दिन सोने को कीजो महाराज 
        सोने को सब दिन सोने की रात
सोने की दियरा जलाओ महाराज 

पद अज्ञात 05/09/2023

Avatar

Avatar

- { नन्द महामहोत्सव की मङ्गल बधाई ||😍🤗💐
नन्दस्त्वात्मज उत्पन्ने जाताह्लादो महामनाः
आहूय विप्रान् वेदज्ञान स्नात: शुचिलङ्कृत।।

- आजु बधाई नंद कै माई ||

आजु बधाई नंद कैं माई।
व्रज की नारि सकल जुरि आइं।
सुंदर नंद महर कैं मंदिर। 
प्रगटयौ पूत सकल सुख-कंदर।
जसुमति-ढोटा व्रज की सोभा। 
देखि सखी, कछु औरै गोभा।
लछिमी-सी जहँ मालिनि बोलै। 
बंदन-माला वाँधत डोलै।
द्वार बुहारति फिरतिं अष्टसिधि। 
कौरनि सथिया चीततिं नवनिधि।
गृह-गृह तैं गोपी गवनीं जब। 
रंग-गलिनि विच भीर भई तब।
सुबरन-थार रहे हाथनि लसि। 
कमलनि चढ़ि आए मानौ ससि।
उमँगी प्रेम-नदी-छवि पावैं। 
नंद-सदन-सागर कौं धावै।
कंचन कलस जगमगैं नग के। 
भागे सकल अमंगल जग के।
डोलत ग्वाल मनौ रन जीते। 
भए सबनि के मन के चीते।
अति आनंद नंद रस भीने। 
परबत सात रतन के दीने।
कामधेनु तैं नैंकु न हीनी। 
द्वै लख धेनु द्विजनि कौं दीनी।
नंद पौरि जे जाँचन आए। 
बहुरौ फिरि जाचक न कहाए!
घर के ठाकुर कैं सुत जायौ। 
सूरदास तब सब सुख पायौ॥

पद सूरदास 13/03/2023

Avatar

Avatar