अरे ढोलिया रे ढोल बजाओ।
आज झूम झूम नाच नाच गावो। 
प्रगट भई श्री राधा, लाडली श्री राधा ....

लाडली को जनमदिन आयो,
मेरो सॉंचो भाग्य सवारों,
लाडो को लाड लडाओ।
आज झूम झूम नाच नाच गावो। 

सखी देखो री आज बरसाना,
जहॉं गूंगा भी गावे तराना,
गली-गली में शोर मचावो।
आज झूम झूम नाच नाच गावो। 

आज रसिको की शान निराली,
देखो भादों में बायाी दिवाली,
दो नैनो के दीप जलाओ।
आज झूम झूम नाच नाच गावो। 

ये तो सब वृज की रखवारी,
ये तो कीरति की राजदुलारी,
ये तो सब रसिकन की रिझवारी,
सब मिलकर के ठुमका लगावो।
आज झूम झूम नाच नाच गावो। 

लीजे लाल छाक हों लाई।
भर भर डला सीस पै धरके जसुमति मात पठाई।।
मूंग भात घृत कढ़ी सलोनी, रोटी लीटी अधिक सिकाई।
उरद के बड़ा दही में बोरे,आदो नींबू सरस खटाई।।
शाक सुरन बेंगन बथुआ अरू मेथी सरस मृदु चौराई।
पूरी पापड़ी रूचिर कचोरी पापड़ बड़ी पकौड़ी भुजाई।।
लुचई मोदक मगद जलेबी गुंजा मठड़ी अधिक पठाई।
माखन खीर खांड बासोंधी दधि शिखरन ओट्यौ दूध मलाई...

माधुरी मुरली अधर धरें।
बैठे मदनगुपाल मनोहर सुंदर कदँब तरैं॥
इत-‌उत अमित ब्रज-वधू ठाढ़ीं, बिबिध बिनोद करैं।
गाय-मयूर-मधुप रस-माते, नहीं समाधि टरै॥
झाँकी अति बाँकी ब्रज-सुत की, कलुष-कलेस हरै।
बसत नयन-मन नित्य निरंतर, नव-नव रति सँचरै॥

होरी को रसिया मन भायो ।
रसिया ये नंदगाँव ते आयो, नन्द यशोदा घर जायो ।।
धोती पटका पाग बांध सिर, मुकुट धरे बनठन आयो ।
"मदनगोपाल" होरी के रसिया, आज करूंगी तेरो मनभायो ।।

बृज में होरी को आनंद ।
यह आनंद रस चाखन प्रकट्यो, बृजहि सच्चिदानंद ।।
ज्योती रूप रह्यो वह जौलौं, जरत रह्यो निज अंग ।
जौलौं अयन नार पहि कीन्हों, पायो विषधर संग ।।
कमठ मीन वाराह बिकट वपु, केतिक जीवन धारे ।
लखि ना पर्यो रस बिंदु प्रेम को, रहे सिंधु ज्यों खारे ।।
श्रीराधा रससार नारि जब, तिरछी चितवन देख्यो ।
नीरस निर्गुण ब्रह्म ईश तब, प्रेम रंग रस पेख्यो ।।
सोई जुगल प्रेम आनंद रस, बरषत बृज चहुँ ओरी ।
'मदनगोपाल' के हिरदय खेलत, प्रियालाल रंग होरी ।।

कमलकली बृषभानु नंदिनी, भौंरा नंदकुमार हो।
रस ले रस बर्षावत प्यारो, करत प्रेम व्यौपार हो।।
पिय प्यारी अरु प्यारी पिय, दोउन दोऊ रिझवार हो।
'मदनगोपाल' रसिकन मन श्रीवन, यों ही करो विहार हो।।

लाल नेक भवन हमारे आवो ।
जो मांगो सो देहो मोहन ले मुरली कल गावो ।।१।।
मंगलचार करो गृह मेरे संगके सखा बुलावो ।
करो विनोद सुंदर युवतीनसों प्रेम पीयूष पीवावो ।।२।।
बलबल जाऊं मुखारविंदकी ललित त्रिभंग दीखावो ।
परमानंद सहचरी रसभर ले चली करत उपावो ।।३।।

आजु  सखी  अद्भुत  भाँति  निहारि  । 
प्रेम  सुदृढ़  की  ग्रंथि  परि  गई  गौर स्याम   भुज  चारि  ।। 
अबहीं  प्रात  पलक  लागी  हैं ,  मुख  पर  श्रम  कन  वारि  । 
नागरीदास  रस  पिवहु  निकट  व्है  अपने  वचन  निवारि  ।।

श्री ललिता गनगौर हमारी ।
श्री कुँजबिहारिन की सुखकारिन ,लाड़ लाड़वत  ज्यौं प्रिया भावत , पूँछि पूँछि तिन  कुँजबिहारी ।१।
संपति संग वृंदावन राजत  , दंपति रुख सुख सेवा साजत , नेहभरीं सबहींन संचारी ।
प्रेम प्रकासिनि श्री हरिदासिनि , रसिकन की रस तृषा नसावनि , राखत अटल सुहाग संभारी ।२।
सब गुन आगर  चिर रस सागर  , सोई निधिवन नागरि नागर , प्रीति प्रतीति रसरीत उजारी ।
श्रीराधा चरण दासि निज जीवन , सेवौं कृष्णचन्द्र प्रिया पति धन ,  राखी हौं सरन जाऊँ बलिहारी ।३।

वृन्दाबन की शोभा निऱखत मेरे नयन सिरात ।
कुन्ज निकुन्ज पुन्ज सुख बरसत हरसत मन के गात।
राधा माघब के निज मंन्दिर महाप्रलय नही जात।
ब्रम्हा ते उपज्यो न अखण्डित कबहू नाहि नसात ।
फणिपर रबिपर नही बिराट पर नही संन्ध्या नही प्रातः ।
माया काल रहित नित नूतन सदा फूल फल पात ।
निर्गुण सगुण ब्रम्ह ते न्यारो बिहरत सदा सुहात।
ब्यास बिलास रास अद् भुत गति निगम अगोचर गात ।